ប្រភពមកពីៈhttp://kohsantepheapdaily.com.kh
រាជធានីភ្នំពេញ ៖ នៅថ្ងៃអាទិត្យ ទី២២ មីនា នាសប្ដាហ៍នេះ កីឡាករកម្ពុជា២រូប គឺ ម៉ន ភារម្យ និង ផាន់ គ្រាន់ ដែលសុទ្ធតែជាជើងខ្លាំងនៅលើសង្វៀនក្នុងស្រុកនឹងរង់ចាំទទួលស្វាគមន៍កីឡាករជើងខ្លាំងមកពីថៃនៅលើសង្វៀនទូរទស្សន៍អាស៊ីអាគ្នេយ៍ (SEATV) ។ អ្នកទាំងពីរបានត្រៀមកណ្តាប់ដៃស្វាគមន៍ភ្ញៀវថៃនៅក្នុងព្រឹត្តិការណ៍ប្រដាល់អន្តរជាតិពេលរសៀល ដែលជាទូទៅ គឺពីរសប្ដាហ៍មានការប្រកួតអន្តរជាតិម្ដងនោះ ។
ការប្រកួតដែលមានការរំពឹងថា នឹងកក្រើកនេះ មានការចាប់អារម្មណ៍តាំងពីមានការប្រកាសថា កីឡាកររូបណាចូលរួមប្រកួតនោះទៅទៀត ដោយសារតែការប្រដាល់ជាលក្ខណៈអន្តរជាតិរមែងទទួលបានការកន្ត្រាក់អារម្មណ៍ខ្ពស់ពីអ្នកស្នេហាវិស័យប្រដាល់នៅកម្ពុជា ។ ជាពិសេសគ្រាន់តែដឹងថា វត្តមានសម្រាប់ការប្រកួតនៅរសៀលថ្ងៃអាទិត្យនេះ គឺជាកីឡាករវ័យក្មេង ដែលមានកម្រិតប្រកួតល្អនោះរឹតតែរុញឲ្យមានការចង់តាមដាន ។ កីឡាករម៉ន ភារម្យ គឺជាជើងខ្លាំងមួយរូបប្រចាំនៅក្នុងក្លិបព្រែកឯងកីឡា ដែលមានឈ្មោះបោះសំឡេងនាពេលចុងក្រោយ បើទោះជាលោកហាក់បាត់មុខមួយរយៈព្រោះតែហេតុផលផ្ទាល់ខ្លួន ។ កីឡាកររូបនេះត្រូវគេកត់សម្គាល់ថា ល្អកែង ម៉ាត់ និងទាត់ឆ្វេងស្ដាំ ។
ក្នុងនោះក៏មានការបញ្ជាក់ពីការត្រៀមខ្លួនមុននឹងមានការផ្គូផ្គងផងដែរសម្រាប់ភាគីខាងកម្ពុជា ។ លោកម៉ាង ម៉ន ជាគ្រូបង្វឹកបានអះអាងថា កាលពីមួយរយៈមុន ម៉ន ភារម្យ មិនបានហ្វឹកហាត់ជាប់លាប់ទេ ទើបមិនអាចឲ្យលោកផ្ដល់ឱកាសឲ្យឡើងប្រកួតជាលក្ខណៈអន្តរជាតិ ប៉ុន្តែសម្រាប់ពេលនេះលោកមានទំនុកចិត្តដោយសារតែសិស្សបានបង្ហាញនូវការតាំងចិត្ត និងភាពសកម្មក្នុងការហ្វឹកហាត់បានល្អប្រសើរ ។ ក្នុងនាមជាគ្រូបង្វឹកលោកជឿភាគច្រើនថា ម៉ន ភារម្យ នឹងឈ្នះការប្រកួត ទោះមិនទាន់សិក្សាពីដៃគូដែលត្រូវប៉ះគ្នាគ្រប់គ្រាន់ក្តី ។ ទោះបីយ៉ាងណា កម្រិតនៃការត្រៀមទុកមិនមែនជាអ្វីដែលមហាជនយល់ស្របតាមនោះទេ ក្នុងពេលដែលអ្នករៀបចំកម្មវិធីក៏អះអាងថា ដៃគូដែលមកប្រកួតជាមួយ មិនមែនបាវសាក់ ឬជាកីឡាករថ្មីថ្មោងក៏ទេដែរ ។
ប្រភពពីទូរទស្សន៍អាស៊ីអាគ្នេយ៍ប្រាប់ថា គូប្រកួតរបស់ ម៉ន ភារម្យ ឈ្មោះ Khum Lek ដែលធ្លាប់ឆ្លងកាត់ការប្រកួតបាន៤៥លើក ឈ្នះ៤០លើក និងចាញ់តែ៥លើកប៉ុណ្ណោះនៅលើសង្វៀនប្រទេសថៃ ។ កីឡាករ Khum Lek ក៏ត្រូវគេអះអាងថា ជាជើងខ្លាំងមួយរូបក្នុងប្រភេទទម្ងន់៥៤គីឡូក្រាមដែលភាគីខាងកម្ពុជា មិនមែនគ្រាន់តែរំពឹង ហើយអាចឈ្នះដោយស្រួលដូចមាត់នោះឡើយ ។ លោកថៃ អ៊ូ អ្នកដឹកនាំកីឡាករបរទេសមកប្រកួតនៅរាល់ព្រឹត្តិការណ៍អន្តរជាតិរបស់ស្ថានីយទូរទស្សន៍មួយនេះ ប្រាប់ថា Khum Lek នៅប្រទេសថៃត្រូវចាត់ទុកជាជើងថ្មីមែន ប៉ុន្តែគេជាជើងថ្មីដែលមានសមត្ថភាពល្អ និងធ្វើឲ្យមានការទទួលស្គាល់នៅក្នុងពិភពប្រដាល់ថៃ ។ ទោះ ម៉ន ភារម្យឆ្លងកាត់ការប្រកួតបានដល់៥៥លើក ឈ្នះ៤៥លើក និងចាញ់១០លើក ដែលអាចនិយាយបានថា មានបទពិសោធន៍ល្អជាង ក៏លោកនៅតែមិនយល់ស្របថា ងាយស៊ីកីឡាករ Khum Lek នោះឡើយ ។ ស្រួលមិនស្រួល Khum Lek នឹងត្រឡប់ទៅវិញដោយស្ពាយមោទនភាពបន្ទាប់ពីការប្រកួតនោះផង ។ យ៉ាងណាក៏ដោយ មានតែការប្រកួតជាក់ស្ដែងប៉ុណ្ណោះ ដែលអាចអារកាត់សម្រាប់លទ្ធផលជាក់លាក់ចុងក្រោយ ដោយមិនមែនគ្រាន់តែសំអាងលើកត្តានេះ ឬហេតុផលនោះ ហើយដៅលទ្ធផលចេញទៅកើតនោះទេ ។
សម្រាប់កីឡាករផាន់ គ្រាន់ វិញនឹងត្រូវឡើងប្រកួតជាមួយកីឡាករថៃឈ្មោះ Cheang Kai ក្នុងប្រភេទទម្ងន់៦៥គីឡូក្រាម ។ វត្តមានរបស់អ្នកទាំងពីរបានទទួលការចាប់អារម្មណ៍ខ្លាំងជាងគូ ម៉ន ភារម្យ ទៅទៀត ដោយសារភាគីខាងកម្ពុជា គឺជាកីឡាករល្បីឈ្មោះ និងមានក្រេឌីតល្អសម្រាប់មហាជនខ្មែរ ។ គ្រាន់តែឮថា ផាន់ គ្រាន់ ឡើងប្រដាល់ជាថ្មី មានការដាក់សំណួរភ្លាមៗថា កីឡាករមកពីប្រទេសថៃ ជាកីឡាករកម្រិតណា ព្រោះបើត្រឹមតែជាកីឡាករធម្មតា ពិតជាស្ពាយការបរាជ័យទៅវិញដោយចៀសមិនផុត បើទោះជាស្ថានភាពរស់នៅ និងការហ្វឹកហាត់របស់ប្រទេសទាំងពីរមានភាពខុសគ្នាដោយសារតែរឿងចំណូលរកបានក្តី ។ ជាបទពិសោធន៍ កីឡាករផាន់ គ្រាន់ កម្រផ្ដល់ឱកាសឲ្យកីឡាករឆ្លងដែនដល់ទឹកទី៥ណាស់ ហើយបើទោះជាបានឈ្នះពិន្ទុ ក៏មានន័យថា ដៃគូដែលលោកប៉ះប្រកួត ជាកីឡាករលំដាប់ជួរមុខប្រចាំនៅក្នុងប្រទេសថៃនោះដែរ។ សំអាងលើកណ្ដាប់ដៃមហាទម្ងន់ និងកែងបកប្រៀបដូចលើកញញួរទម្ងន់១០គីឡូសំពងលើដៃគូ កីឡាករកម្ពុជារូបនេះកម្របណ្ដោយឲ្យដៃគូគេចផុតខ្លាំងណាស់ ទើបមានការជជីកសួរដដែលជាដដែលថា គូប្រកួតដែលលោកប៉ះជាមួយខ្លាំងដែរឬធម្មតា ?
យោងតាមការប្រកាស កីឡាករ Cheang Kai ឆ្លងកាត់ការប្រកួតបាន៦៥ដង ឈ្នះ៤៦ដង ចាញ់១៧ដង និងស្មើ២ដង ដែលតួលេខនេះអាចអះអាងថា មានចំណុចខ្ពស់ជាងកីឡាករកម្ពុជាសម្រាប់បទពិសោធន៍។ ប៉ុន្តែគេនៅមិនទាន់ច្បាស់ថា តើកីឡាករ Cheang Kai ជាកីឡាករលំដាប់ក្នុងប្រភេទទម្ងន់៦៥គីឡូក្រាម ឬគ្រាន់តែជាកីឡាករធម្មតានោះឡើយ ។ ប្រភពពីអ្នកបញ្ជូនមក មិនបានបង្ហាញទិន្នន័យលម្អិតពាក់ព័ន្ធនឹងកីឡាកររូបនេះទេ ដោយបានត្រឹមតែអះអាងថា ទាល់តែខ្លាំងគួរឲ្យកត់សម្គាល់ទើបសម្រេចដាក់ឲ្យចុះមកប្រកួតនៅកម្ពុជា ដើម្បីកំដរ ផាន់ គ្រាន់ ។ លោកញាណ សុធី អ្នករៀបចំការប្រកួតប្រចាំនៅស្ថានីយ ទូរ ទស្សន៍ អាស៊ីអាគ្នេយ៍បានអះអាងថា កីឡាករថៃដែលបានបញ្ជូនឲ្យមកប្រកួត បើទោះជាមានចំណុចខ្វះខាតខ្លះ ប៉ុន្តែលោកទុកចិត្តគ្រប់គ្រាន់ ដោយសារតែលោកថៃ អ៊ូ ស្គាល់ច្បាស់ថា កីឡាករថៃប្រភេទណាទើបអាចប៉ះជាមួយកីឡាករកម្ពុជារូបនេះបាន។
លោកប្រើពាក្យប្រកបដោយភាពជឿជាក់ថា «កីឡាករដែល ថៃ អ៊ូ យកមកបើមិនខ្លាំងគាត់មិនយកមកទេ ព្រោះពួកយើងបានចុះកុងត្រាជាមួយគ្នាច្បាស់លាស់!» ។ ក្រុមអ្នកទស្សនានៅតែជឿជាក់ថា កីឡាករកម្ពុជា ផាន់ គ្រាន់ នឹងបង្កើនតួលេខអ្នកចាញ់ខ្លួនម្នាក់ទៀតសម្រាប់ការប្រកួតមួយនេះ បើទោះជាកីឡាករ Cheang Kai មានការអះអាងថា មិនមែនជាជើងខ្លាំងធម្មតា ។ គាប់ជួនជាកីឡាករផាន់ គ្រាន់ ធ្លាប់ប្រកួតបាន៦០ដង ឈ្នះ៤៧ដង ចាញ់៨ដង និងស្មើ៥ដង ដែលជាតួលេខមិនអន់ជាងថៃផង ទើបការព្យាករហាក់លម្អៀងខ្លាំងមកលើកីឡាកររូបនេះ ។ យ៉ាងណាក៏ដោយ លោកញាណ សុធី និងលោកថៃ អ៊ូ ប្រាប់ថា ការព្យាករបានត្រឹមតែសន្និដ្ឋានទុកមុនប៉ុណ្ណោះ ប៉ុន្តែលទ្ធផលសម្រេច គឺទាល់តែការប្រដាល់នៅថ្ងៃអាទិត្យនាវេលាម៉ោង២រសៀលនោះតទៅ ទើបវាស់ស្ទង់ការពិតបាន ៕
