ប្រភពមកពីៈhttp://kohsantepheapdaily.com.kh
រាជធានីភ្នំពេញ ៖ បន្ទាប់ពីយកឈ្នះលើក្រុមម៉ាកាវក្នុងលទ្ធផល៤-១ សម្រាប់ការប្រកួតទាំងពីរជើង ក្រុមបាល់ទាត់របស់ប្រទេសកម្ពុជា នឹងបានបោះជំហានទៅកាន់ការប្រកួតក្នុងជុំទី២ ជាបន្តជាមួយក្រុមប្រទេសចំនួន៣៩ ផ្សេងទៀតប្រចាំទ្វីបអាស៊ី ។ យ៉ាងណាក៏ដោយ ក្រុមកម្ពុជានៅមិនទាន់ប្រាកដពីក្ដីសង្ឃឹមនៅឡើយទេ ដរាបណាការចាប់ឆ្នោតចែកពូលនៅមិនទាន់ដឹងនៅឡើយថា ត្រូវឈរនៅក្នុងពូលដែលមានប្រទេសណាខ្លះដែលខ្លួនត្រូវប្រឈម ។
ជាមួយនឹងលទ្ធផលដ៏ត្រចះត្រចង់ជូនជាតិ ក្រុមបាល់ទាត់របស់ប្រទេសកម្ពុជាពិតជាបានឆ្លងផុតក្នុងវគ្គជម្រុះជុំទី១ សម្រាប់ក្រុមខ្សោយទាំង១២ ដូចការគ្រោងទុក ។ លទ្ធផលប្រកួតក្នុងទឹកដីឈ្នះ៣-០ និងក្រៅទឹកដីស្មើ១-១ បានជួយឲ្យកម្ពុជាមានគ្រាប់បាល់សរុប ឈ្នះគូបដិបក្ខម៉ាកាវ៤-១ បោះជំហានទៅកាន់ជុំទី២ ។ ក្នុងចំណោមក្រុមទាំង១២ មានតែពាក់កណ្ដាលប៉ុណ្ណោះបានឡើងទៅវគ្គបន្តក្នុងនោះរួមមានកម្ពុជា ទីម័រខាងកើត ប៊ូតង់ ឥណ្ឌា និងចិនតៃវ៉ាន់ ខណៈដែលយ៉េមែន និងប៉ាគីស្ថានកំពុងចាំអ៊ុតមើលការប្រកួតដែលបានលើកពេល ។ ដ្បិតថា នេះជាការប្រកួតកម្រិតបឋមសម្រាប់វគ្គជម្រុះព្រឹត្តិការណ៍ World Cup ឬបាល់ទាត់ពិភពលោក ប៉ុន្តែអ្នកគាំទ្រកម្ពុជា មានការចាប់អារម្មណ៍យ៉ាងខ្លាំងសម្រាប់ការប្រកួតមួយនេះ ។
ប្រជាជនកម្ពុជាភាគច្រើនបានបន់ស្រន់ស្ទើរគ្រប់មាត់ សូមឲ្យក្រុមបាល់ទាត់របស់ខ្លួនទទួលបានជោគជ័យសម្រាប់ការប្រកួតក្នុងវគ្គជម្រុះជុំទី២ ។ ក្រុមប្រទេសដែលមានកៅអីទៅកាន់វគ្គបន្តទាំង៦ នឹងឡើងទៅបូកជាមួយ៣៤ក្រុមទៀតដែលឈរចាំស្រាប់ប្រចាំទ្វីបអាស៊ីទាំងមូលដើម្បីចាប់ពូលប្រកួតជម្រុះក្នុងជុំទី២ ។ ក្រុមទាំង៤០នោះ ត្រូវចែកជា៨ពូលដោយមួយពូលមាន៥ក្រុម ហើយតម្រូវឲ្យធ្វើការប្រកួតគ្នាសន្សំពិន្ទុចុះឡើងៗ រហូតរកឃើញអ្នកឈរលេខ១ក្នុងពូល និងអ្នកឈរលេខ២ក្នុងពូល ។ ជំហានបន្ទាប់នឹងមានក្រុមប្រទេសដែលជាប់ចំណាត់ថ្នាក់លេខ២ ក្នុងពូលតែ៤ក្រុមប៉ុណ្ណោះ មានឱកាសឡើងទៅប្រកួតក្នុងជុំទី៣។ ការកំណត់នេះនឹងផ្ដោតជាសំខាន់លើគ្រាប់បាល់ដែលក្រុមប្រទេសទទួលបានចំណាត់ថ្នាក់លេខ២ ក្នុងពូលទាំង៨ សម្រេចបាន ។
ដូច្នេះហើយទើបការប្រកួតជម្រុះក្នុងជុំទី៣ នឹងមានប្រទេសតែ១២ប៉ុណ្ណោះ មានសំណាងបានឡើងទៅប្រកួត ដោយ៨ក្រុមបានពីលទ្ធផលចំណាត់ថ្នាក់លេខ១ប្រចាំពូល និង៤ក្រុមទៀតបានពីអ្នកមានគ្រាប់បាល់នាំមុខគេក្នុងចំណោមអ្នកឈរចំណាត់ថ្នាក់លេខ២ប្រចាំពូល ។ ក្រុមប្រទេសទាំង១២ នឹងបន្តប្រកួតប្រជែងគ្នាដោយតានតឹងបំផុត ជម្រុះយកតែ៤ក្រុមចុងក្រោយឡើងទៅប្រកួតនៅក្នុងព្រឹត្តិការណ៍ World Cup ប្រចាំឆ្នាំ២០១៨ នៅក្នុងប្រទេសរុស្ស៊ី ។ ចំពោះក្រុមប្រទេសដែលរង់ចាំស្រេចទាំង៣៤ប្រទេសដែលត្រៀមចាប់ពូលជាមួយក្រុមកម្ពុជា និង៥ក្រុមទៀតដែលទើបបានឡើងរួមមាន កូរ៉េខាងត្បូង អុីរ៉ង់ ជប៉ុន ចិន អូស្ត្រាលី អ៊ូសបេគីស្ថាន អេមីរ៉ាតអារ៉ាប់រួម កាតា អូម៉ង់ ហ្ស៊កដានី អារ៉ាប៊ីសាអូឌីត បារ៉ែន អុីរ៉ាក់ ប៉ាឡេស្ទីន លីបង់ កូវ៉ែត ហ្វីលីពីន ម៉ាល់ឌីវ វៀតណាម តាហ្ស៊ីគីស្ថាន មីយ៉ាន់ម៉ា អាហ្វហ្គានីស្ថាន ថៃ តួកមេនីស្ថាន កូរ៉េខាងជើង ស៊ីរី កៀហ្ស៊ីស៊ីស្ថាន ម៉ាឡេស៊ី ហុងកុង សិង្ហបុរី ឥណ្ឌូណេស៊ី ឡាវ ហ្គាម និងបង់ក្លាដែស ។
ក្រុមប្រទេសទាំងនេះនឹងធ្វើការចាប់ឆ្នោតចែកពូល នៅថ្ងៃទី១៤ មេសា ឆ្នាំ២០១៥ នៅក្នុងប្រទេសម៉ាឡេស៊ី និងដំណើរការប្រកួតចាប់ពីថ្ងៃទី១១ មិថុនា ២០១៥ រហូតដល់ថ្ងៃទី២៩ មីនា ឆ្នាំ២០១៦ ។ អញ្ចឹងហើយ ទើបក្រុមអ្នកគាំទ្ររបស់ប្រទេសកម្ពុជាបានបង្ហាញការភិតភ័យ និងបួងសួងសូមឲ្យក្រុមប្រទេសរបស់ខ្លួនមានវាសនាបានស្ថិតក្នុងពូលជាមួយក្រុមប្រទេសដែលមានកម្រិតប្រហាក់ប្រហែលខ្លួន ឬអន់ជាងខ្លួន ជាជាងប៉ះជាមួយក្រុមប្រទេសដែលមានសមត្ថភាពខ្លាំងដាច់តែម្ដងក្នុងជំហានជម្រុះជុំទី២នេះ ។ នៅលើបណ្ដាញសង្គមហ្វេសប៊ុក គេឃើញអ្នកតាមដានព្រឹត្តិការណ៍ជោគជ័យរបស់កម្ពុជា បង្ហោះសារជូនពរស្ទើរគ្រប់គណនេយ្យ សុំកុំឲ្យក្រុមកម្ពុជាស្ថិតក្នុងពូលជាមួយប្រទេសខ្លាំងៗ ។ កម្ពុជានឹងមានសំណាងល្អ ឬអាក្រក់ ត្រូវយោងលើជោគវាសនាក្នុងការចាប់ឆ្នោតក្នុងជំហាននេះ ព្រោះបើស្ថិតក្នុងពូលជាមួយក្រុមខ្សោយនៅទ្វីបអាស៊ីនោះក្ដីសង្ឃឹមនឹងកើនឡើងខ្ពស់សម្រាប់ការប្រកួតជម្រុះក្នុងវគ្គចែកពូល ។ តើក្រុមប្រទេសណាខ្លះដែលកម្ពុជាគួរចៀសឲ្យផុតក្នុងជំហានចែកពូល ?
ជាការពិតក្នុងចំណោមក្រុមប្រទេសទាំង៣៩ ជាគូប្រជែង គឺមិនមានក្រុមណាដែលអសមត្ថភាពធ្វើឲ្យកម្ពុជាសង្ឃឹមខ្ពស់នោះទេ ដោយក្រុមប្រទេសខ្លះដ្បិតថា ទើបនឹងមានមុខចូលប្រកួត ឬកើតក្រោយកម្ពុជាក៏ពិតមែន ក៏មានកម្រិតខ្លាំងក្លាគួរឲ្យបារម្ភ ជាក់ស្ដែងដូចជាក្រុមទីម័រខាងកើតជាដើម ។ យ៉ាងណាក៏ដោយ ក្រុមកម្ពុជានឹងមានសំណាងអាចរំលេចក្ដីសង្ឃឹមបានល្អសម្រាប់ការប្រកួត ប្រសិនបើការចាប់ពូល គឺមិនស្ថិតក្នុងក្រុមជាមួយប្រទេសយក្សៗនៅទ្វីបអាស៊ីដែលមានវិស័យបាល់ទាត់រីកចម្រើនខ្លាំងក្លា ។ ក្រុមដែលកម្ពុជាបួងសួងសូមឱ្យគេចឲ្យផុតរួមមាន ជប៉ុន កូរ៉េខាងត្បូង កូរ៉េខាងជើង ចិន និងអូស្ត្រាលីជាដើម ។ ក្នុងនោះក្រុមនៃប្រទេសក្បែរខាងរួមមាន ថៃ សិង្ហបុរី និងវៀតណាម ក៏ជាឧបសគ្គសម្រាប់ក្រុមកម្ពុជាផងដែរ ប្រសិនបើចាប់ពូលបានប៉ះជាមួយ។
យ៉ាងណាក៏ដោយ ការប្រកួតបាល់ទាត់មិនសុទ្ធតែសំអាងថា ក្រុមខ្លាំងនឹងឈ្នះក្រុមខ្សោយរហូតនោះទេ ដ្បិតជាភស្ដុតាងស្រាប់ ក្រុមប្រទេសដែលមានទម្រង់លេងស្លូតៗមិនសូវកាច និងមិនមានការចាប់អារម្មណ៍ថាអាចទៅរួច ក៏អាចបំបាក់ក្រុមខ្លាំងដើម្បីកាន់ពានបាល់ទាត់ពិភពលោកផងដែរ តួយ៉ាងដូចជាក្រុមប្រទេសក្រិកដែលបានកាន់ពានបាល់ទាត់ប្រចាំទ្វីបអឺរ៉ុប ដោយនឹកស្មានមិនដល់កាលពីឆ្នាំ២០០៤ ដូច្នេះដែរ ។ ជាមួយនឹងឧទាហរណ៍នេះក្រុមប្រទេសកម្ពុជាដែលគេចាត់ទុកថា ជាក្រុមខ្សោយមួយក្នុងទ្វីបអាស៊ី ក៏ពិតជាទទួលឱកាសនោះដូចគ្នា ប្រសិនបើមានសំណាងផ្សំជួយក្នុងពេលប្រកួតជាក់ស្ដែង ។ ជាពិសេសបើការចាប់ពូលជួយឲ្យក្រុមកម្ពុជា បានប៉ះក្រុមប្រទេសដែលមានកម្រិតប្រហាក់ប្រហែលគ្នានឹងទទួលបានបទពិសោធន៍កាន់តែច្រើនពីការប្រកួតឈ្នះតាមជំហានជាលំដាប់ៗ គឺពិតជាអាចទប់ក្រុមខ្លាំងក្នុងជុំបន្តបន្ទាប់ ដណ្ដើមបានកៅអីទៅកាន់ការប្រកួតបាល់ទាត់ពិភពលោកនៅក្នុងប្រទេសរុស្ស៊ីជាក់ជាមិនខាន ។
អ្វីៗមានតែការជូនពរ និងបួងសួង សូមឲ្យក្រុមបាល់ទាត់របស់កម្ពុជាជួបសំណាងល្អតាមការចង់បានប៉ុណ្ណោះដើម្បីមានឈ្មោះបោះសំឡេងនៅក្នុងព្រឹត្តិការណ៍បាល់ទាត់ពិភពលោកប្រចាំឆ្នាំ២០១៨ ដែលជាការស្រេកឃ្លានខ្លាំងបំផុតរបស់ប្រជាជនខ្មែរ និងជនរួមជាតិនៅក្រៅប្រទេស ៕
